إبني وحبيبي، عبدالعزيز وليد الزهير
في عصر يوم السبت الموافق ٣١ يوليو ٢٠٢١
إنتقل إلى جوار ربه، إبني وحبيبي عبدالعزيز.
قدر الله وما شاء فعل، ولا لنا غير الدعاء له بالرحمة والمغفرة… ربي ألهمنا الصبر…
وُلد عبدالعزيز في ١٧ يناير ١٩٩٣م، وكان أول أولادي الذكور، وثالث أبنائي بعد فادية رحمها الله، والهنوف الله يحفظها. يليه حمد و سليمان الله يحفظهم ويحميهم جميعاً.
صحبته مرحة ولازم تكون منتبه على النكته، لأنها ممكن تجي من تحت الطاولة. ما يحب يشيل في خاطره على أحد، خصوصاً إذا الموضوع لا يمس مبدأ أو أخلاق أو إنسانية. صحيح أحياناً تمر على الإنسان ضغوط شخصية أو مهنية (وهذا وضعنا كلنا) يعالجها أحسن مني بمليون مرة.
ما استغربنا عند إختياره للمحاسبة والضرائب في دراسته وشغله، من صغره وإدارته للحصالة مو مثل بقيه الأطفال. ويحسبها صح حتى في شراء الألعاب.
في مرة إحتاج فلوس، فقلت له: عندك ثلاث نخلات في بيت جدك، قص السعف القديم، ولك ١٥٠ ريال لكل نخلة. (إضافة: قصينا السعف بمنشار كهربائي، وسحبنا الي قصيناه للحاوية القريبة - أجلكم الله)
زارونا ضيوف وكان بينهم ولد قريب من سِنّه، ولعبوا مع بعض بلايستيشن، إلى أن ناداه أبوه علشان يمشون.
الولد يحن على أبوه: أبي من هاللعبة ما عندي منها.. قوم يا عبدالعزيز، شيل اللعبة من البلايستيشن وحطها في علبتها، وأهداها الولد.. يازين الضيافة.. كريم من صغره الله يرحمه.
على طاري الهدايا الغير متوقعة، إخته ترقّت في عملها في نفس فترة يوم ميلادها. وبما أنها تحب القراءة، وسلسلة كتب هاري پوتر كانت من القصص والأفلام المفضلة عندها، فعبدالعزيز استأجر أحد ممثلي أفلام هاري پوتر، وطلب منه يقول لها كلمة تهنئة مع أغنية.
أحياناً تكون وناسته العلبه الفاضية، كأنه قطو. فيسحب بطانيته (ممو) ويتكي داخل العلبة مع بطانيته.. لكن لا يشوفه أحد، ينحرج وينحاش.
وهو صغير، يقلب الحروف في بعض الكلمات، مثلاً:
إذا ما جاز له شي، قال عنه: قمعبع.
إذا يبي فواكه، قال: أبي فوكات.
يسمّي الدفتر: دَسوَر.
وبدل لا يقول عن سلة النفايات زبالة (أجلكم الله) ، يقول: زلابة.
الآن مع بعض الصور.. إلى رحمة الله يا حبيبي..
رحلة مؤثرة ومبكيه شكله بريء ولطيف وطيب
الله يرحمه ويغفرله ويجعل قبره روضة من رياض الجنة ولا يجعله حفره من حفر النار .. الله يجبر بخاطرك ويجعلك من الصابرين المحتسبين